مقدمہ خداوندعالم نے تمام انبیاء اور اولیاء کو اس لئے مبعوث فرمایا ہے تاکہ وہ انسانوں کو زندگی گزارنے کا طور و طریقہ سکھائیں اور ان کی عقل و خرد کو حیات نو عطا کرکے انسانیت کو منزل کمال و شرف اور قرب الہی تک پہنچائیں انبیاء علیہم السلام کی آمد کا سلسلہ خاتم الانبیاء حضرت محمد مصطفی صلی اللہ علیہ وآلہ وسلم پر ختم ہوا اور قرآن کریم کے نزول سے انسانی زندگی کے تمام نظام معین ہوئے اور پیغمبر اسلام صلی اللہ علیہ وآلہ وسلم کے ذریعے یہ قرآنی پیغام انسانوں تک پہنچا ،رسول اسلام صلی اللہ علیہ وآلہ وسلم کی شہادت کے بعد آپ کے عظیم الشان جانشینوں نے کتاب الہی اور علوم نبوی کو معارف قرآنی کی شکل میں بیان فرمایا اوراس وقت یہ عظیم و گرانقدر میراث جو انسانیت کے کمال و فضیلت کی ضامن ہے ہمارے ہاتھوں میں ہے اور ہم پر واجب ہے کہ اس کی حفاظت کریں اس کے معارف سے آشنائی و آگاہی پیداکریں اور دوسروں کو بھی اس سے روشناس کرائیں ، اسلامی جمہوریہ ایران میں رونما ہونے والے اسلامی انقلاب کی وجہ سے دنیا کے بہت ے ممالک میں جدید افکارونظریات پیدا ہوئے۔ جس نے دنیا کے بہت سے مادی پرستوں اور خواہشات نفسانی میں غرق افراد کو معنویت و کمال ، اخلاق اسلامی اور انسانی صفات و شرف کی طرف راغب کردیا اور مختلف جوامع بشری میں ہزاروں انسان معارف اسلامی کی شناخت ومعرفت اور اسے درک کرنے کے لئے تحقیق و جستجو میں مشغول ہوگئے دینی اور اسلامی تعلیمات کے مطابق دینی والہی تعلیمات سے آشنائی رکھنے والوں کا وظیفہ ہے کہ وہ ان تعلیمات سے لوگوں کو باخبر کریں اور اس سلسلے میں دنیا کے تمام انسانوں کے لئے اسلامی آثار کا ترجمہ ثقافتی اعتبار سے سب سے زيادہ اہمیت کا حامل اور ایک لازمی تحریک ہے۔ خداوندعالم کا لاکھوں شکرہے کہ ادارہ تحریک ترجمہ نے معارف الہیہ اور اسلامی آثارکے ترجمہ کے ذریعے ، علوم آل محمد علہیم السلام سے لوگوں کو سیراب کرنے اور انسانوں کے سوالات و شبہات کے مستند و معتبرجواب کے لئے نشرو اشاعت کی عظیم ذمہ داری سنبھالی ہے ۔ادارے کا مقصد عالم انسانیت میں اسلامی آثار کے ترجموں کے ذریعے معارف الہیہ اورسنت نبویہ کی نشرواشاعت اور ترویج کا اہتمام۔ ادارے کی سرگرمیاں ادارے نے مذکورہ بالا اہداف کے حصول کے لئے مندرجہ ذیل اغراض و مقاصد کوسرفہرست قراردیا ہے ۔ الف۔ عام افراد، محققین اور اسلامی تعلیمات کی شناخت و معرفت رکھنے والوں کے لئے آثار اسلامی تک دسترسی اورتشنگان معارف الہی کی علمی پیاس بجھانے کے لئے متعدد امور کا اہتمام ۔ ٭ مختلف زبانوں میں ترجمہ ہونے والے اسلامی آثار سے پوری دنیا کے عوام کو روشناس کرانا اورایک عظیم و جامع ڈیٹا بیس کا قیام۔ ٭ مختلف زبانوں میں اسلامی متون و آثار پر مشتمل ادارے کی ویب سائٹ کا قیام۔ ٭ مخاطبین کی ضرورت کے اعتبارسے مختلف زبانوں میں منتخب کتب اور مقالات کا ترجمہ۔ ٭ اسلامی معارف وتعلیمات کو آسان اور سادہ الفاظ میں عام لوگوں تک پہنچانے کے لئے منتخب کتابوں اور مقالوں کی تلخیص اورمختلف زبانوں میں ترجمہ۔ ٭ اسلامی کتب سے استفادہ کرنے والوں کے لئے تخصصی اور سوشل ویب سائٹ اور نیٹ ورکس کے ذریعےمعلومات فراہم کرنا۔ ب۔ اسلامی کتب کے ترجمے اوراشاعت کے سلسلے میں موجود رکاوٹوں کودورکرنے کے لئےدرج ذیل طریقوں سے بھرپور کوشش کرنا۔